२०८३ असोज १८ गते काठमाडौँको खुलामञ्चमा सुरु भएको नेपाली कांग्रेसको १५औँ महाधिवेशनमा मधेश प्रदेशबाट केन्द्रीय पदाधिकारीमा उम्मेदवारी दिने नेताहरूको संख्या उल्लेख्य बढेको छ।
नेपाली कांग्रेसले केन्द्रीय कार्यसमितिको आकार १६७ बाट बढाएर २९७ सदस्यीय बनाएको छ भने पदाधिकारी संख्या १४ बाट बढाएर २६ पुर्याएको छ। यस विस्तारित संरचनामा मधेशको उपस्थिति बलियो बनाउन नेताहरूले उपसभापति र सहमहामन्त्री पदमा आफ्नो दाबी प्रस्तुत गरेका छन्।
उपसभापतिमा तीन नेताको उम्मेदवारी
मधेशबाट उपसभापति पदमा तीन नेताले उम्मेदवारी दर्ता गरेका छन्। धनुषाका डा. चन्द्रमोहन यादवले खुलातर्फ उपसभापतिमा उम्मेदवारी दिएका छन्। उनी यसअघि कांग्रेस केन्द्रीय सदस्य थिए।
बारा–पर्सा क्षेत्रका प्रभावशाली नेता फरमुल्लाह मन्सुरले समावेशी उपसभापतिमा उम्मेदवारी दिएका छन्। उनी १४औँ महाधिवेशनमा देउवा समूहबाट मुस्लिम क्लस्टरतर्फ सहमहामन्त्री निर्वाचित भएका थिए र पूर्व श्रम तथा रोजगार मन्त्रीसमेत हुन्। मन्सुरले पाँच दशक लामो राजनीतिक यात्रामा संसदीय र संगठनात्मक दुवै अनुभव हासिल गरेका छन्।
सप्तरीका रञ्जित कर्णले पनि समावेशी उपसभापतिमा उम्मेदवारी दर्ता गरेका छन्। कर्ण नेपाल विद्यार्थी संघका पूर्व अध्यक्ष र संविधानसभा सदस्यसमेत भइसकेका छन्। उनी २०६९ सालमा नेविसंघको नेतृत्वमा पुगेका थिए र पछिल्लो समय पार्टीको मधेश राजनीतिमा सक्रिय छन्।
सहमहामन्त्रीमा ११ नेताको दाबी
सहमहामन्त्री पदमा मधेशबाट ११ नेताले उम्मेदवारी दिएका छन्। पूर्व सहमहामन्त्री तथा पूर्व मन्त्री महेन्द्र यादवले धनुषाबाट मधेशी क्लस्टरतर्फ सहमहामन्त्रीमै पुनः उम्मेदवारी दिएका छन्। उनले अघिल्लो कार्यकालमा हासिल गरेको संगठनात्मक अनुभवलाई निरन्तरता दिन र मधेश तथा कांग्रेसबीचको सम्बन्ध अझ बलियो बनाउन पुनः प्रतिस्पर्धा गरेको बताएका छन्। यादव यसपटक सभापति गगनकुमार थापा नेतृत्वको कांग्रेसमा सक्रिय छन्।
मधेशी क्लस्टरतर्फ सहमहामन्त्रीमा महेन्द्र यादवसँगै धनुषाका रामपल्टन साह, मुक्ताकुमारी यादव, सर्लाहीका मनिष कुमार मिश्र, अजय चौरासिया, नागिना यादव, किरण यादव र अभिषेक प्रताप साहले पनि उम्मेदवारी दर्ता गरेका छन्। मुक्ताकुमारी यादव विशेष महाधिवेशनबाट मधेशी क्लस्टरतर्फ सहमहामन्त्री बनेकी थिइन् र पुनः सोही पदमा दोहोरिने तयारीमा छिन्।
सप्तरीका तेजुलाल चौधरीले थारू क्लस्टरतर्फ सहमहामन्त्रीमा उम्मेदवारी दिएका छन्। उनी तीनपटक प्रतिनिधिसभा सदस्य निर्वाचित भइसकेका छन् भने पूर्व युवा तथा खेलकुद राज्यमन्त्री र मन्त्रीसमेत भइसकेका छन्। धनुषाका अब्दुल सत्तारले मुस्लिम क्लस्टरतर्फ सहमहामन्त्रीमा उम्मेदवारी दिएका छन्। उनी १४औँ महाधिवेशनबाट केन्द्रीय सदस्य निर्वाचित भएका थिए र नेपाल मुस्लिम संघका संस्थापक अध्यक्षसमेत हुन्। मधेशबाट निर्वाचित कांग्रेस सांसद फिरदोश आलमले पनि सहमहामन्त्रीमा उम्मेदवारी दिने भएका छन्।
केन्द्रीय समितिमा मधेशको बढ्दो प्रतिनिधित्व
१२औँ महाधिवेशनपछि महामन्त्रीविहीन रहेको मधेश प्रदेशमा यसपटक उपसभापति पदमा रञ्जित कर्णको दाबीले मधेशको नेतृत्वदायी भूमिका खोजिएको संकेत गर्छ। १५औँ महाधिवेशनमा मधेशले कांग्रेसको पदाधिकारी तहमा आफ्नो उपस्थिति बलियो बनाउने प्रयास गरेको देखिन्छ।
उम्मेदवारको अन्तिम नामावली असोज २१ गते बिहान १०:०० बजे प्रकाशन गरिनेछ भने मतदान असोज २२ गते बिहान ७:०० बजेदेखि साँझ ५:०० बजेसम्म राष्ट्रिय सभागृह, खुलामञ्च र प्रज्ञा भवनमा हुनेछ। यी उम्मेदवारमध्ये कसले बाजी मार्छन् भन्ने विषयले कांग्रेसभित्रको शक्ति सन्तुलनमा मधेशको भूमिकालाई समेत प्रभावित गर्नेछ।
