कैलालीको धनगढी उपमहानगरपालिका–१७ धुर्जन्नामा चट्याङ लागेर सात जना घाइते भएका छन्।
जिल्ला प्रहरी कार्यालयका अनुसार, असोज १९ गते राति स्थानीय खुशिलाल चौधरीको घरको छतमा जन्मदिन मनाइरहेका बेला घर नजिकै चट्याङ पर्दा त्यसको झिल्का लागेर उनीहरू घाइते भएका हुन्।
घाइते हुनेमा ३५ वर्षीया आरती चौधरी, १७ वर्षीया आयुसरा चौधरी, १३ वर्षीया श्रृष्टी चौधरी, ५५ वर्षीया बाग्मती चौधरी, सात वर्षीय सिसिर चौधरी, १४ वर्षीया रेनुका चौधरी र ३५ वर्षीया जानकी चौधरी रहेका छन्।
घाइते सबैलाई तत्काल उपचारका लागि सेती प्रादेशिक अस्पताल धनगढी लगिएको थियो। जिल्ला प्रहरी कार्यालय कैलालीका सूचना अधिकारी प्रहरी नायब उपरीक्षक योगेन्द्र तिमिल्सिनाले अस्पतालमा उपचाररत सबैको अवस्था सामान्य रहेको जानकारी दिएका छन्।
चट्याङले घरमा पुर्याएको क्षतिको विस्तृत विवरण भने अझै प्राप्त भएको छैन। घटनाबारे थप अनुसन्धान भइरहेको प्रहरीले जनाएको छ।
