भोटेकोशी बाढीले चिलिमे जलविद्युत् आयोजनाको सुरुङ नजिक पुगेको नेपाली सेनाले चार शव फेला पारेको छ। रसुवाको स्याफ्रुबेँसीबाट सुरुङसम्म पुग्ने सडक निर्माण गरी उद्धार टोलीले खोजी तीव्र पारेको छ।
सैनिक प्रवक्ता एवं सहायक रथी राजाराम बस्नेतले चिलिमे आयोजनाको सुरुङ क्षेत्र साँघुरो भएकाले हेलिकप्टरबाट डोजर झार्न नसकिएको बताए। उद्धार टोलीले २४ घण्टा खटिएर बाढीले थुपारेको लेदो सफा गरिरहेको छ।
सेनाका अनुसार माथिल्लो त्रिशूली–१ जलविद्युत् आयोजनाबाट हालसम्म चार शव सङ्कलन भएको छ। त्रिशूली–३ ‘बी’ र चिलिमे आयोजनामा उद्धार प्रयास जारी छ। त्रिशूली–३ बीमा एक सयभन्दा बढी फौज खटिएका छन्।
चिलिमे आयोजनाको सुरुङमा नेपाली सेना र भारतीय उद्धारकर्मीले संयुक्त रूपमा उद्धार गरिरहेका छन्। इन्जिनियर गोकर्ण चौधरीका अनुसार उद्धार टोली टनेलको मुखनजिक पुगेको छ। बाढीले थुपारेको लेदो, ढुङ्गा र कङ्क्रिट हटाउँदै अवरोध पन्छाउने काम भइरहेको छ।
