नेपाली कांग्रेसको १५औं महाधिवेशनमा सभापति पदका लागि किशोरसिंह राठौरले उम्मेदवारी दर्ता गरेपछि गगनकुमार थापा र श्यामकृष्ण खड्गीसहित त्रिपक्षीय प्रतिस्पर्धा निश्चित भएको छ। असोज २० गते (मंगलबार) राष्ट्रिय सभागृहमा उम्मेदवारी दर्तापछि सञ्चारकर्मीहरूसँग कुरा गर्दै राठौरले आफू निर्वाचित भए पार्टीमा न्याय, मर्यादा र अनुशासन कायम गर्ने दाबी गरे।
राठौरले ३५ वर्षसम्म साथ दिएका नेताहरूले अहिले आफूलाई मैदानमा एक्लै छाडेकोमा गुनासो पोखे। उनले भने, ‘मैले ३५ वर्ष जुन नेताहरूलाई साथ दिएँ, आज तिनै नेताहरूले मलाई उम्मेदवार बनाएर गगन थापा विरुद्ध मैदानमा उतार्नुपर्थ्यो। तर आज म एक्लै उभिनुपरेको छ, यसमा सबैको कमजोरी छ।’ उनले पार्टीको जिम्मेवारीमा बसेर निर्वाचनमा आफ्नै पार्टीलाई हराउन भूमिका खेल्ने केन्द्रीय सदस्य, जिल्ला तथा क्षेत्रीय सभापतिलाई पार्टीबाटै निष्कासन गर्ने चेतावनी दिए। आफूलाई कुनै व्यक्तिको नभई पार्टीको आधिकारिक संस्थापन पक्षधर दाबी गर्दै राठौरले निर्वाचन आयोग र सर्वोच्च अदालतको फैसलापछि रुख र चारतारे झन्डा जोगाउन आफू संस्थापन पक्षमै अडिग रहेको बताए।
कांग्रेसलाई एकताबद्ध बनाउने एजेन्डासहित प्रतिस्पर्धामा उत्रिएका राठौरले पार्टीभित्रको विभाजन र असन्तुष्टि अन्त्य गर्दै न्याय, समान व्यवहार र अवसर सुनिश्चित गर्ने तथा कांग्रेसको राजनीतिक मर्यादा पुनःस्थापित गर्ने आफ्नो प्राथमिकता रहेको बताए।
राठौरको ३५ वर्षे राजनीतिक यात्रा
बर्दियाको राजापुर नगरपालिका निवासी ५७ वर्षीय राठौरले २०४१ सालदेखि नेपाल विद्यार्थी संघ (नेविसंघ) मार्फत राजनीतिक यात्रा सुरु गरेका थिए। उनी २०४९ सालमा त्रिचन्द्र क्याम्पसको स्ववियु सचिव र २०५१ सालमा सभापति बने। २०५९ सालमा नेविसंघको अध्यक्षको जिम्मेवारी सम्हालेका थिए। त्यसअघि, २०५७ सालमा नेविसंघको अध्यक्ष पदमा विश्वप्रकाश शर्मासँग प्रतिस्पर्धा गर्दा धाँधली भएको उनको दाबी छ।
विद्यार्थी राजनीतिबाट पार्टीको मूल राजनीतिमा आएका राठौर १२औँ महाधिवेशनबाट कांग्रेस केन्द्रीय सदस्य बने। २०७८ मंसिरमा सम्पन्न १४औँ महाधिवेशनमा तत्कालीन नेपाली कांग्रेसका पूर्व सभापति शेरबहादुर देउवाको प्यानलबाट सहमहामन्त्री निर्वाचित भएका थिए।
उनको राजनीतिक यात्रामा निर्वाचनका अनुभव मिश्रित छन्। २०६४ सालको संविधानसभा निर्वाचनमा उनी माओवादीका मानबहादुर चौधरीसँग झिनो मतान्तरले पराजित भएका थिए। २०७९ सालमा बाँके क्षेत्र नम्बर–३ बाट निर्वाचित भए पनि गत फागुनमा बर्दिया क्षेत्र नम्बर–२ बाट उम्मेदवार बनेका राठौर राष्ट्रिय स्वतन्त्र पार्टीका श्रीधर पोख्रेलसँग ९ हजार २७६ मतान्तरले पराजित भएका थिए।
राठौरले राष्ट्रिय स्वतन्त्र पार्टीले कांग्रेसलाई भित्तामा पुर्याएको र कम्युनिस्टहरू एकजुट भइरहेको अवस्थामा कांग्रेसभित्र दुईवटा महाधिवेशनको अभ्यास हुनु खतरनाक भएको टिप्पणी गरे। उनले नेपाली कांग्रेसका पूर्व सभापति शेरबहादुर देउवा र पूर्णबहादुर खड्काकै कारण नेपाली कांग्रेसका सभापति गगन थापा सफल भएको टिप्पणी गर्दै पुरानो संस्थापन पक्षको हालत विशेष महाधिवेशनमा गएको भए यति खराब नहुने दाबी गरे।
राठौरले चुनावी नतिजा जे आए पनि राजनीति नछाड्ने बताएका छन्। यसपटक जित्न नसके पनि १६औं महाधिवेशन जित्ने लक्ष्यका साथ आफू देशभर संगठन निर्माणमा खटिने उनले सुनाए। १५औं महाधिवेशनअन्तर्गत मतदान असोज २२ गते (बिहीबार) बिहान ७ बजेदेखि साँझ ५ बजेसम्म हुने कार्यतालिका छ। मतदान सकिएलगत्तै मतगणना सुरु गरिने र परिणाम घोषणा गरिने निर्वाचन समितिले जनाएको छ।
