नारायणघाट–बुटवल सडकखण्डमा बाँदरका कारण हुने दुर्घटना न्यूनीकरणका लागि रु पाँच लाखभन्दा कम लागतमा थप दुई ओभरहेड क्यानोपी ब्रिज निर्माण गरिने भएको छ।
पूर्वपश्चिम राजमार्गको यो खण्ड एसियाली राजमार्ग मापदण्डअनुसार चार लेनमा विस्तार भइरहेको छ, जसले गर्दा सवारीको गति र संख्या दुवै बढेको छ। नारायणघाट–बुटवल सडक विस्तार योजना पूर्वी खण्डका सूचना अधिकारी इन्जिनियर शिव खनालका अनुसार, पहाडी क्षेत्रबाट तराईतर्फ बाँदरहरू आउन थालेपछि राजमार्गमा दुर्घटना बढेको छ। उनले बाँदरहरूले बाटो काट्दा मानिसको समेत मृत्यु भएको र यसबाट हुने क्षति न्यूनीकरणका लागि पुल आवश्यक रहेको बताए। इन्जिनियर खनालले यो पहल वन्यजन्तुको प्राकृतिक आवतजावतलाई सहज बनाउनुका साथै जैविक विविधता संरक्षण र सडक पूर्वाधारलाई वातावरणमैत्री बनाउने प्रयासको एक हिस्सा भएको जनाए।
नवलपरासी (बर्दघाट–सुस्तापूर्व) खण्डमा यसअघि नै गैँडाकोट–१० स्थित पितौँजी जङ्गलमा एउटा ओभरहेड क्यानोपी ब्रिज निर्माण भइसकेको छ। यो पुल ३४ मिटर लामो र चार फिट चौडा छ। इन्जिनियर खनालले उक्त पुलबाट फाट्टफुट्ट बाँदरहरू वारपार गरेको देखिए पनि यसको पूर्ण प्रभावकारिता मूल्याङ्कन गर्ने समय नभएको जनाए। उनले बाँदरलगायतका जनावरलाई पुल प्रयोग गर्न आकर्षित गर्न सुरुमा फलफूल राख्ने तयारी भइरहेको जानकारी दिए।
नारायणघाट–बुटवल सडक विस्तार परियोजना एसियाली विकास बैंक (ADB) को ऋण सहयोगमा अघि बढेको हो, जसको कुल लागत करिब १६ अर्ब ९९ करोड ५२ लाख ९५ हजार रुपैयाँ छ। चिनियाँ कम्पनी चाइना स्टेट कन्स्ट्रक्सन इन्जिनियरिङ कर्पोरेसनले २०७५ चैत्र ५ गतेबाट यो परियोजनाको काम सुरु गरेको थियो। ११३ किलोमिटर लामो सडकखण्डलाई नारायणगढदेखि दाउन्नेसम्म पूर्वी खण्ड (६५ किलोमिटर) र दाउन्नेदेखि बुटवलसम्म पश्चिम खण्ड (४९ किलोमिटर) गरी दुई भागमा विभाजन गरिएको छ। परियोजना अन्तर्गत बस्ती क्षेत्रमा छ लेन, जङ्गल क्षेत्रमा चार लेन र दाउन्नेमा तीन लेनको सडक निर्माण गरिनेछ। यस योजना अन्तर्गत पूर्वी खण्डमा २९ वटा पुल निर्माण भइसकेका छन् भने ३८ वटा साना पुलमध्ये ३५ वटा बनिसकेका छन्। दाउन्ने क्षेत्रमा २ वटा र तिसियनमा एउटा पुल निर्माण हुन बाँकी छ। यस योजनाले जैविक विविधता संरक्षण तथा प्रवर्द्धनका लागि राजमार्ग छेउछाउका जङ्गलभित्र पानीपोखरी निर्माण गर्ने र चोरीसिकारी नियन्त्रणमा सहयोग गर्ने जस्ता काम पनि गरिरहेको छ।
२०८२ वैशाख ३ गतेसम्म पूर्वी खण्डको भौतिक प्रगति करिब ६३ प्रतिशत र पश्चिम खण्डको ६१.८ प्रतिशत पुगेको छ। २०८२ भदौ २० गतेसम्म करिब ११४ किलोमिटर लामो सडकखण्डमध्ये १०० किलोमिटरमा कालोपत्रे भइसकेको छ। दाउन्ने र विभिन्न पुलका एप्रोच सडक गरी करिब १३ किलोमिटर मात्र कालोपत्रे हुन बाँकी छ। ठेकेदार कम्पनी चाइना स्टेट कन्स्ट्रक्सन इन्जिनियरिङ कर्पोरेसनले २०८३ असारसम्म गैँडाकोटदेखि दुम्किबाससम्म एकतर्फी सडक कालोपत्रे गरेर सक्ने लक्ष्य राखेको थियो। दाउन्ने क्षेत्रमा ११0 मिटर पहाड कटिङको काम बाँकी रहेकोले २०८२ वैशाख १५ गतेदेखि रातको समयमा (राति ११ बजेदेखि बिहान ५ बजेसम्म) सडक बन्द गरी काम भइरहेको छ। योजनाले निर्माण सकिएको पुलमा बाँदरलाई आकर्षित गर्न फलफूल राख्ने तयारी गरेको छ। समग्र परियोजनाको चौथो पटक थपिएको म्याद २०८३ साउन ७ गतेसम्म रहेको छ।
