रसुवाको चिलिमे जलविद्युत आयोजनाको सुरुङमा बाढीले फसाएका ९ जनाको शव भेटिएको छ। उद्धार टोलीले ३ जनालाई सकुशल बाहिर निकालेको छ।
बुधबार गोताखोर टोलीले चिलिमे सुरुङभित्रबाट ३ शव र एउटा मानव अंग फेला पारेको थियो। नेपाली सेना, सशस्त्र प्रहरी बल र भारतीय टनेल विशेषज्ञहरूको टोलीले खोजी तीव्र पारेको थियो।
सैनिक प्रवक्ता (सहायकरथी) राजाराम बस्नेतका अनुसार सुरुङभित्रबाट पानी आएपछि गोताखोर टोली १३० मिटरभित्र पसेर शव निकालेको हो।
चीनको ल्हेन्दे खोलाको बाढीले रसुवा र नुवाकोटमा ११ जलविद्युत आयोजना प्रभावित भएका छन्। स्वतन्त्र ऊर्जा उत्पादकहरूको संस्था (इप्पान) का अनुसार ११ वटै आयोजनाको सुरुङमा मानिस फसेका छन्। सेनाको नेतृत्वमा ६ आयोजनामा उद्धार भइरहेको छ।
हालसम्म विभिन्न आयोजनाको सुरुङबाट ९ शव निकालिएको छ। रसुवा भोटेकोशीमा २ शव, लाङटाङ खोलामा २ शव, चिलिमेमा ४ शव (एउटा खुट्टाको भाग सहित) र त्रिशूली–३ ए मा १ शव भेटिएको छ।
उद्धारकर्मीले भदौ १९ मा त्रिशूली–३ ए सुरुङबाट सञ्जय साह र कबिर महर्जनलाई जीवितै उद्धार गरेका थिए। भदौ २० मा माथिल्लो त्रिशूली–१ सुरुङबाट चिनियाँ नागरिक लुआइतोलाई सकुशल उद्धार गरियो। रसुवागढीबाट सुरुमा दुई जनालाई हेलिकप्टरमार्फत उद्धार गरिएको थियो।
चिलिमे जलविद्युत आयोजनामा उद्धारकर्मीले पावरहाउस क्षेत्रमा खोजी तीव्र पारेका छन्। २२ मेगावाटको चिलिमेमा उद्धारका लागि सेनाले स्याफ्रुबेँशीदेखी सुरुङसम्म हेभी उपकरण लैजान बाटो बनाएको थियो।
