राष्ट्रिय स्वतन्त्र पार्टी (रास्वपा) का सभापति रवि लामिछानेले भोटेकोशी नदीमा आएको बाढीका कारण भएको क्षति, उद्धार र राहतका विषयमा छलफल गर्न सर्वदलीय बैठक आह्वान गरेका छन्।
बिहीबार बिहान ९ बजे सिंहदरबारस्थित रास्वपा संसदीय दलको कार्यालयमा बस्ने बैठकमा बाढीबाट भएको क्षतिको विवरण, तत्काल गरिने उद्धार कार्य, राहत वितरण र पुनर्स्थापनाका योजनाबारे विस्तृत छलफल हुनेछ। रास्वपा प्रवक्ता जगदीश खरेलले बैठकको पुष्टि गरेका छन्।
यसअघि लामिछानेले रसुवा, नुवाकोट र धादिङमा बाढीबाट प्रभावित नागरिकको जीवनरक्षा र उद्धारलाई पहिलो प्राथमिकतामा राखेर संयमित र जिम्मेवार ढंगले अघि बढ्न पार्टीका नेता कार्यकर्ता र शुभेच्छुकलाई निर्देशन दिएका थिए।
उनले बाढी तथा अन्य विपद्को जोखिममा रहेका नागरिकलाई सुरक्षित स्थानमा जान, जोखिम क्षेत्रमा नबस्न र स्थानीय प्रशासन तथा सुरक्षा निकायका निर्देशन पालना गर्न आग्रह गरेका छन्।
लामिछानेले विपद्बारे सूचना प्राप्त गर्दा आधिकारिक सरकारी निकाय, स्थानीय प्रशासन, सुरक्षा निकाय र विश्वसनीय सञ्चारमाध्यमबाट प्राप्त सूचनालाई मात्र आधार बनाउन अनुरोध गरेका छन्। अप्रमाणित सूचना, हल्ला र अफवाह सामाजिक सञ्जालमा नफैलाउन आग्रह गर्दै उनले गलत सूचनाले उद्धार तथा राहत कार्यमा कठिनाई सिर्जना गर्ने र नागरिकमा अनावश्यक त्रास फैलाउन सक्ने बताएका छन्।
रास्वपाका स्थानीय तहदेखि केन्द्रीय तहसम्मका नेता तथा सदस्यलाई सम्बन्धित स्थानीय प्रशासन र सुरक्षा निकायसँग समन्वय गरी उद्धार, राहत तथा स्वयंसेवी काममा सक्रिय रूपमा सहभागी हुन पनि लामिछानेले आह्वान गरेका छन्।
विपद्को यस घडीमा नागरिकको जीवनरक्षा, सुरक्षित उद्धार र मानवीय सहयोगलाई सबैको साझा प्राथमिकता बनाउनुपर्नेमा उनले जोड दिएका छन्। बाढीबाट प्रभावित नागरिकप्रति ऐक्यबद्धता जनाउँदै उनले सुरक्षित रहन र एकअर्कालाई सहयोग गर्न अपिल गरेका छन्।
