राष्ट्रपति रामचन्द्र पौडेलले आइतबार मध्यराति दुई महत्त्वपूर्ण विधेयकहरू प्रमाणीकरण गरेका छन्। संघीय संसदका दुवै सदनबाट पारित भई प्रमाणीकरणका लागि राष्ट्रपति भवन पठाइएका यी विधेयकहरूले निर्वाचन प्रक्रिया र मतदाता नामावलीलाई थप व्यवस्थित बनाउने अपेक्षा गरिएको छ।
संविधानको धारा ११३ को उपधारा (२) बमोजिम राष्ट्रपति पौडेलले ‘प्रतिनिधिसभा सदस्य निर्वाचन (पहिलो संशोधन) विधेयक, २०८३’ र ‘मतदाता नामावली (पहिलो संशोधन) विधेयक, २०८३’ लाई प्रमाणीकरण गरेका हुन्। राष्ट्रपति कार्यालयका प्रवक्ता रितेशकुमार शाक्यले जारी गरेको विज्ञप्तिअनुसार यी विधेयकहरू प्रमाणीकरण भएको पुष्टि भएको छ।
