नवलपरासी पूर्वमा बस दुर्घटना: ६ जनाको मृत्यु, १२ घाइते

अपडेट (15:42, 2026-10-03)

नवलपरासी (बर्दघाट–सुस्तापूर्व) को दाउन्नेमा भएको बस दुर्घटनामा मृत्यु भएका छ जनाकै सनाखत भएको छ। यसअघि एक जनाको पहिचान खुल्न बाँकी रहेकोमा अहिले सबै मृतकको पहिचान खुलेको जिल्ला प्रहरी कार्यालय नवलपरासी (बर्दघाट–सुस्तापूर्व) ले जनाएको छ। मृत्यु हुनेमा बाँकेको खजुरा गाउँपालिका–२ का ३६ वर्षीय बस चालक सुरेश बिसी पनि रहेका छन्।

प्रहरीका अनुसार, यसअघि जाजरकोट भेरीगङ्गा नगरपालिका–३ का ५० वर्षीय निर्जुङ खत्री भनिएकोमा अहिले उनको नाम निर्जुङ गुरुङ रहेको पुष्टि भएको छ। बाँकेको कोहलपुर नगरपालिका–३ का ३२ वर्षीय दीपेन्द्र केसी, कोहलपुर–१० का ५५ वर्षीय एकेन्द्रराज रेग्मी, नेपालगञ्ज उपमहानगरपालिका–७ का २२ वर्षीय कृष कनौजिया र बाजुराको स्वामीकार्तिक गाउँपालिकाका ६५ वर्षीय नरेन्द्रराज गिरीको पनि सनाखत भएको छ।

घाइते १२ जनामध्ये आठ जनालाई मध्यबिन्दु प्रादेशिक अस्पताल, डण्डामा प्रारम्भिक उपचारपछि थप उपचारका लागि चितवनको भरतपुरस्थित चितवन मेडिकल कलेज शिक्षण अस्पताल पठाइएको छ। बाँकी चार जना घाइतेको भने मध्यबिन्दु प्रादेशिक अस्पतालमै उपचार भइरहेको अस्पतालले जनाएको छ। यसअघि गम्भीर अवस्थामा रहेका भनिएका बाँकेका अस्लाम भगवानलाई चितवनस्थित नयाँ मेडिकल कलेजमा रिफर गरिएको प्रहरीले बताएको छ।

अपडेट (11:02, 2026-10-03)

नवलपरासी (बर्दघाट सुस्ता पूर्व) मा भएको बस दुर्घटनामा घाइते हुनेको संख्या बढेको छ। यसअघि ९ जना घाइते भनिएकोमा अहिले १२ जना घाइते भएको जिल्ला प्रहरी कार्यालय नवलपुरले पुष्टि गरेको छ।

दुर्घटनामा मृत्यु भएका ६ जनामध्ये पाँच जनाको पहिचान खुलेको छ। यसअघि एक जना मृतकको मात्र पहिचान खुलेको भनिएकोमा अहिले जाजरकोट भेरीगङ्गा नगरपालिका–३ का ५० वर्षीय निर्जुङ खत्री, बाँकेको कोहलपुर नगरपालिका–३ का ३२ वर्षीय दिपेन्द्र केसी, बाजुराको स्वामीकार्तिक गाउँपालिकाका ६५ वर्षीय नरेन्द्रराज गिरी, बाँकेको कोहलपुर नगरपालिका–१० का ५५ वर्षीय एकेन्द्रराज रेग्मी र नेपालगञ्ज उपमहानगरपालिका–७ का २२ वर्षीय कृष कनौजियाको सनाखत भएको प्रहरीले जनाएको छ। एक जना अन्दाजी ४०/४२ वर्षीय पुरुषको भने पहिचान खुल्न बाँकी रहेको छ।

घाइतेमध्ये एक जनाको अवस्था गम्भीर रहेकाले थप उपचारका लागि चितवन रिफर गरिएको छ। अन्य घाइतेको उपचार मध्यबिन्दु प्रादेशिक अस्पताल डण्डा र भरतपुर अस्पतालमा भइरहेको जिल्ला प्रहरी कार्यालय नवलपुरका डीएसपी अनिल पण्डितले जानकारी दिएका छन्।

अपडेट (08:57, 2026-10-03)

नवलपरासी (बर्दघाट सुस्ता पूर्व) मा भएको बस दुर्घटनामा घाइते हुनेको संख्या प्रहरीले अद्यावधिक गरेको छ। यसअघि १० जना घाइते भनिएकोमा अहिले ९ जना घाइते भएको प्रहरीले पुष्टि गरेको छ। घाइतेमध्ये २ जनाको अवस्था चिन्ताजनक रहेको मध्यविन्दु प्रादेशिक अस्पतालले जनाएको छ।

यसअघि एक जना मृतकको पहिचान खुलेको भनिए पनि जिल्ला प्रहरी कार्यालयका सूचना अधिकारी अनिल पण्डित र सशस्त्र प्रहरीका सहप्रवक्ता (डीएसपी) शैलेन्द्र थापाका अनुसार मृतकहरूको सनाखत भइसकेको छैन। प्रहरीले मृतकहरूको पहिचान गर्ने कार्य जारी रहेको बताएको छ।

यसैबीच, प्रधानमन्त्री बालेन शाहले मौसमजन्य खतरा अझै नटरेको र जोखिम कायमै रहेकाले सबैलाई सतर्क रहन आग्रह गरेका छन्। उनले यस्ता दुर्घटनाबाट बच्न आवश्यक सावधानी अपनाउनुपर्नेमा जोड दिएका छन्।