उद्योग, वाणिज्य तथा आपूर्ति मन्त्री गौरीकुमारी यादवको राजीनामा सोमबार बसेको मन्त्रिपरिषद् बैठकले स्वीकृत गरेको छ।
यादवको राजीनामा स्वीकृत भएसँगै रिक्त उद्योग मन्त्रालयको जिम्मेवारी सम्हाल्न सुनसरी–४ का सांसद दीपक साहलाई राष्ट्रपतिसमक्ष सिफारिस गरिएको छ। सरकारी प्रवक्ता एवं शिक्षामन्त्रीले मन्त्रिपरिषद्का निर्णय सार्वजनिक गर्दै यो जानकारी दिए।
बजारमा एलपी ग्यास अभाव चुलिरहेका बेला मन्त्री यादवले ‘उद्योगीलाई पाता नफर्काएसम्म ग्यास सहज हुँदैन’ भनी दिएको अभिव्यक्ति विवादमा परेको थियो।
ग्यास आपूर्ति सहज बनाउन नसकेको र जिम्मेवार पदमा बसेर गैरजिम्मेवार टिप्पणी गरेको भन्दै चौतर्फी आलोचना खेपेपछि उनले राजीनामा बुझाएकी हुन्।
नयाँ मन्त्रीका रूपमा सिफारिस भएका सांसद साह पेसाले इन्जिनियर हुन्। प्रधानमन्त्री बालेन्द्र शाहले साहलाई मन्त्री नियुक्तिका लागि राष्ट्रपति कार्यालयमा सिफारिस पठाइसकेका छन्। साहको शपथग्रहण छिट्टै हुने प्रवक्ताले बताए।
