काठमाडौंमा सांसद खुश्बु ओलीको चरित्र हत्या आरोपमा एक जना पक्राउ परेका छन्।
सामाजिक सञ्जालमा अपमानजनक टिप्पणी गर्दै चरित्र हत्या गरेको भन्दै ओलीले उजुरी दिएकी थिइन्। नेपाल प्रहरीको साइबर ब्युरोले अनुसन्धान थालेको थियो।
ब्युरोले ६१ वर्षीय प्रधुमन श्रेष्ठलाई सोमबार काठमाडौंको सतुंगलबाट पक्राउ गर्यो। उनलाई काठमाडौं जिल्ला अदालतले चार दिनको म्याद थप गरेको छ।
ओलीले फेसबुकमा पोस्ट गरिएका तस्बिरमा अशोभनीय शब्द प्रयोग भएको दाबी गरिन्। उनले प्रधुमन श्रेष्ठसहित करिब तीन दर्जन व्यक्तिविरुद्ध उजुरी दर्ता गराएकी छन्।
साइबर ब्युरोले घटनाबारे थप अनुसन्धान जारी राखेको छ।
यसअघि ओलीले संसदमा यो विषय उठाएकी थिइन्। गृहमन्त्री सुधन गुरुङले दोषीलाई कारबाहीको प्रतिबद्धता जनाएका थिए।
ओलीले लोकतन्त्रमा आलोचना स्वाभाविक भए पनि धम्की र दुर्व्यवहार अस्वीकार्य रहेको बताइन्। उनले व्यक्तिगत मोबाइल र म्यासेन्जरमा बलात्कार तथा भौतिक आक्रमणका धम्की आएको उल्लेख गरिन्।
ओलीले सामाजिक सञ्जालमा दुर्व्यवहार र घृणायुक्त अभिव्यक्तिप्रति शून्य सहनशीलता रहने स्पष्ट पारिन्।
