सिरहाको लहानस्थित हस्पिटल चोकमा लागूऔषध नियन्त्रण ब्यूरोको टोलीले गोली चलाएर ६ जना लागूऔषध कारोबारीलाई नियन्त्रणमा लिएको छ। बिहीबार दिउँसो भएको यो कारबाही लागूऔषध कारोबारीले प्रतिवाद गरेपछि भएको प्रहरीले जनाएको छ।
नियन्त्रणमा लिइएका ६ जनामध्ये ५ जना भारतीय नागरिक र १ जना नेपाली छन्। प्रहरीले उनीहरूको साथबाट २२५ ग्राम खैरो हिरोइन बरामद गरेको छ।
गोली प्रहारबाट एक भारतीय र एक नेपाली नागरिक घाइते भएका छन्। उनीहरूलाई उपचारका लागि स्थानीय अस्पतालमा भर्ना गरिएको छ।
काठमाडौँको कोटेश्वरस्थित लागूऔषध नियन्त्रण ब्यूरोबाट खटिएको विशेष टोलीले यो कारबाही गरेको हो। घटनाबारे थप अनुसन्धान भइरहेको प्रहरीले जनाएको छ।
