रसुवाको गोसाइँकुण्ड गाउँपालिका–५ स्थित पासाङल्हामु सडकखण्डमा शनिबार साँझ करिब १७:४० बजे एउटा विद्युतीय गाडी (ईभी) त्रिशूली नदीमा खस्यो। गाडी सडकबाट करिब २५ मिटर तल खसेको हो।
चीनबाट आयात गरिएको एसआरएम कम्पनीको उक्त गाडी भन्सार जाँचपास गराई काठमाडौँ ल्याउने क्रममा स्याफ्रुबेँसीबाट धुन्चेतर्फ जाँदै थियो। दुर्घटनामा गाडीका चालक बेपत्ता भएका छन्।
प्रहरीका अनुसार दुर्घटनामा परेका चालकको नाम, थर र ठेगाना खुल्न सकेको छैन। गाडीमा अन्य व्यक्ति थिए वा थिएनन् भन्ने यकिन विवरण पनि प्राप्त भएको छैन।
रसुवाका सहायक प्रमुख जिल्ला अधिकारी द्रुवप्रसाद अधिकारीले बेपत्ता हुनेमा रसुवा जिल्ला कालिका गाउँपालिका–३ निवासी २२ वर्षीय सविन तामाङ रहेको बताए।
बेपत्ता चालक र नदीमा खसेको ईभी गाडीको खोजी तथा उद्धार कार्य जारी छ। घटनाबारे थप अनुसन्धान भइरहेको छ।
